Dita e Verdiktit në Hagë

Charles Smith kryeson trupin gjykues që po shqipton aktgjykimin ndaj ish-krerëve të UÇK-së

Trupi gjykues i Dhomave të Specializuara të Kosovës në Hagë, që po shqipton aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit  kryesohet nga gjykatësi amerikan Charles L. Smith III.

Smith po lexon përmbledhjen e aktgjykimit në seancën publike që po mbahet në Hagë, në një nga momentet më të rëndësishme të procesit gjyqësor ndaj ish-krerëve të Ushtrisë Çlirimtare të Kosovës.

Aktgjykimi po shqiptohet veçmas për secilin prej katër të akuzuarve.

Nis seanca vendimtare për ish-krerët e UÇK-së

Me fillim në orën 10:00 – me 10 minuta vonesë transmetim – ka nisur seanca vendimtare në Dhomat e Specializuara të Kosovës në Hagë ndaj ish-krerëve të Ushtrisë Çlirimtare të Kosovës.

Në këtë seancë do të shqiptohet aktgjykimi i shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit.

Përfundon numërimi mbrapsht për ish-krerët e UÇK-së

Ka përfunduar numërimi mbrapsht për ish-krerët e Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, ndërsa në Hagë pritet të nisë shpallja e aktgjykimit ndaj tyre.

Pas gati gjashtë vitesh nga arrestimi dhe transferimi i tyre në Hagë, katër ish-krerët e UÇK-së përballen me momentin vendimtar të procesit gjyqësor që nisi në prill të vitit 2023.

Në Prishtinë, qytetarë janë mbledhur në shesh në kuadër të “Orës së Pritjes”, duke përcjellë nga afër momentin kur Gjykata Speciale do të shpallë vendimin.

Pritja në Kosovë ka marrë një dimension të veçantë, me flamuj të Kosovës dhe të UÇK-së, fotografi të Thaçit, Veselit, Selimit e Krasniqit dhe mesazhe në mbështetje të tyre.

Në Hagë, trupi gjykues pritet të lexojë aktgjykimin ndaj katër të akuzuarve, të cilët përballen me akuza për krime lufte dhe krime kundër njerëzimit.

Procesi ndaj tyre ka zgjatur më shumë se tri vjet në sallën e gjyqit, ndërsa gjatë tij janë dëgjuar 134 dëshmitarë dhe janë shqyrtuar një numër i madh provash.

Tash, pas përfundimit të numërimit mbrapsht, mbetet vetëm vendimi i gjykatës për Hashim Thaçin, Kadri Veselin, Rexhep Selimin dhe Jakup Krasniqin.

Rama: Prishtina po pret, kemi besim në drejtësi

Kryetari i Prishtinës, Përparim Rama, ka thënë se kryeqyteti po pret shpalljen e aktgjykimit në Hagë, duke theksuar se qytetarët do ta përcjellin së bashku verdiktin.

“Prishtina po pret!

Në shesh kemi vendosur ekranin e madh, që qytetarët ta presin së bashku, me dinjitet verdiktin.

Në momente të tilla, duhet të jemi bashkë.

“Prishtina është dhe do të jetë pranë qytetarëve të saj me shpresë, me dinjitet dhe me besim në drejtësi!”, ka shkruar Rama.

Nga ora 10:00, trupi gjykues pritet të bëjë publik aktgjykimin ndaj ish-presidentit të Kosovës, Hashim Thaçi, si dhe ish-krerëve të tjerë të UÇK-së, Kadri Veselit, Jakup Krasniqit dhe Rexhep Selimit.